政壇：鐵頭仁阿涂佗衰卿姐
行政會議成員鄭耀棠同八名立法會議員上個月獲國泰款待去法國接新機，單嘢惹嚟滿城風雨，唔少議員最後都要say sorry。佢哋唔止因為回水而荷包大出血，有份去「收機團」嘅白鴿黨「鐵頭仁」何俊仁同涂謹申，民望都一樣大出血，佢哋固然抵打，但衰在佗衰家，連累埋黨主席劉慧卿添！
設計圖片及對白
香港研究協會今個月四至十二日，用電話訪問咗一千二百五十一人，對比上兩個月，佢哋分別下跌零點二分同零點一九分，只得二點六二分同二點八八分，不過，同樣有份去嘅建仔ＥＱ葛珮帆，就只係微跌零點零一分至二點四三分，呢啲仲唔係同人唔同命！
跌幅冠絕直選議員
雖然鐵頭仁同阿涂搞咗一輪，由最初唔肯道歉，到最後畀卿姐直接指摘兼鬧鑊甘，要求佢哋道歉同回水，仲要交由黨內紀律委員會調查，結果話佢哋已經做咗應做嘅嘢，無需處分，但係唔知係咪市民餘氣未消，卿姐自己嘅民望都急跌零點六四分至二點五五分，跌幅係眾多直選議員之最，喺新界東直選議員排尾三。
因為黨友款待而急跌，黑狗得食、白狗當災，佢兩個今勻真係佗衰家喇！研究協會就促請各位議員，監察政府之餘，唔該睇埋自己行為，費事畀人話係雙重標準。
為免同類事件再次發生，卿姐就去信立法會內務委員會主席，要求交由議員個人利益監察委員會，建議參考外國議會，檢討議員接受海外訪問邀請嘅安排，研究係咪有需要加入限制，同埋修改議員申報個人利益機制。不過，修改機制呢家嘢，搞起嚟冇一年都要半載，班議員最好都係醒醒定定，唔係民望隨時低處未算低，到時補幾多鑊都唔夠喇！
