自貿區香港無份 邊緣化不可避免
重要消息，廣東省省長朱小丹喺粵港合作聯席會議透露，正在籌劃粵港澳自由貿易區。乜話？無留意？社會無討論？唉，又難怪嘅，一來呢個粵港聯席會議不嬲吹水居多，早就淪為港府用嚟裝點門面嘅官場擺設，市民唔關心唔出奇；二來咯喎，香港家陣陷於政治泥沼不能自拔，仲邊有人關心經濟及民生發展吖？
之不過咁，港府房策混亂，「八萬五」目標就話不提等於不存在啫，周邊城市發展一日千里，香港人唔關心唔代表威脅唔存在o架。嗱，朱小丹係咁講嘅，國家調研人員已經到過廣東省考察，相信好快會就自貿區嘅定位同功能向中央作出報告；又話粵港澳自由貿易區同上海自由貿易區定位不同，後者係國際性多邊貿易，而前者主要發揮香港國際金融中心特性，實現貿易自由化，投資便利化及商品自由化，等等等等。不過，呢啲都唔係重點，重點係自貿區嘅選址，朱小丹透露咗幾個選擇，就係深圳前海、廣州南沙同珠海、澳門共同發展嘅橫琴，叮，香港明顯只係一隻「被邀請」參與嘅塘邊鶴！
你話香港係咪弊傢伙吖？以前作為中西橋樑，擔當中國對外窗口嘅獨特角色捨我其誰，今日夾喺粵澳之間，連合組自貿區都只能淪為陪客角色，唔通香港真係難逃被邊緣化命運？自貿區被視為地區經濟發動機，上海搞，天津搞，重慶搞，依家連廣東省同澳門都搞，內地城市百舸爭流，香港斯人獨憔悴，如果再唔發奮自強，點止可能會淪為一個普通內地城市，話唔定有日沉淪到連內地城市都不如吖！
正所謂，不怕風雨大，只怕遇病壞。其實，香港發展前景堪憂，競爭對手發力追趕都唔係最大問題，自己唔爭氣搞到不停內耗空轉至係最大問題。唔信嘅話，大家打開報紙睇吓，政治爭拗無日無之，政治鬥爭愈演愈烈，成個社會都聚精會神搞鬥爭，今日掛住鬥呢個，聽日掛住鬥嗰個，上海搞自貿區無人關心，廣東省急流直上無人理會，咁搞法，香港唔被邊緣化至奇啦。
嗱嗱嗱，內地新一輪改革開放殺到喇，香港再唔醒覺，唔好話被邊緣化，分分鐘以後連企都冇碇企吖。內地頭兩次改革開放，香港搭正順風車，既為國家發展做出貢獻，亦為自己嘅經濟踏上另一個新台階，可惜時移勢易，今日內地全心全意搞經濟，香港一心一意搞政治，面對內地第三次改革開放，恐怕今輪掹車邊都未必得囉。所以難怪有人話，香港再唔爭氣，遲早被祖國放棄，成為自生自滅嘅孤兒仔，叮！
