城中鏡：龐寶林召集「網友」打波
好多人都以為財經「名嘴」只會搵銀，但其實好多都「文武雙全」，好似東驥基金管理董事總經理龐寶林，佢最近就幫個老友，替「香港國際先進網球公開賽2013」聯絡啲財金界同上市公司友好，出席佢哋十一月初開賽日嘅「網球嘉年華會」，一齊打場友誼波，初步佢就搵咗智易東方證券行政總裁藺常念、海通國際證券環球投資策略董事潘鐵珊同匯駿資產管理主席陳永祐做「拍乸」，實行打「雙打」。
龐寶林
潘鐵珊
雖然話係「友誼波」，實情都係比賽，所以龐寶林都好認真，約定佢哋練波，仲諗住問吓香港股票分析師協會班老友有冇興趣一齊玩，搞個選拔賽，揀選財金界嘅網球精英「落場」，以落實最後人腳。不過，會長鄧聲興比賽嗰日就唔得閒。
除財經「名嘴」外，龐寶林亦好努力聯絡緊十四家大型上市公司，希望佢哋都可以派員參賽，另外仲有明星隊。唔講唔知，原來龐寶林喺八十年代中効力怡和集團時，曾幫手搞「第一屆行際網球賽」，同各大洋行員工對壘，最終攞埋冠軍！佢話今次公開賽係香港首次舉辦嘅國際網球聯會先進組賽事，有來自內地同東南亞地區選手參賽，希望能夠辦得有聲有色，為推廣網球活動出一分力。
