瑞士著名腕錶品牌歐米茄以主要贊助商名義支持阿聯酋航空新西蘭隊（Emirates Team New Zealand, ETNZ）出戰今屆喺三藩市舉行嘅美洲盃，爭奪帆船賽事中地位最崇高嘅獎盃。歐米茄專誠喺八月底邀請本港鐘錶業界名人到訪三藩市，包括英皇珠寶鐘錶集團主席楊諾思、喜運佳鐘錶集團主席蔡加讚、太子珠寶鐘錶首席執行主席鄧鉅明同太太鄧宣宏雁、高時錶行常務董事劉展灝等等。

楊諾思（左）嘗試操控帆船。

眾嘉賓體驗帆船起航工作。

蔡加讚親身感受帆船競賽嘅速度感。

鄧鉅明同太太鄧宣宏雁喺酒莊拍照留念。

歐米茄香港區副總裁麥渭安偕同一眾嘉賓參觀新西蘭隊位於舊金山灣嘅基地，仲登上專為觀賞賽事而設嘅帆船，近距離為新西蘭隊打氣。楊諾思、鄧鉅明同蔡加讚亦嘗試操控帆船，仲體驗帆船隊隊員喺船上嘅工作，親身感受帆船競賽嘅速度感，佢哋大呼好玩，話過程剌激又緊張。

國家級酒莊品佳釀

此外，眾嘉賓仲參觀咗喺美國最著名嘅葡萄酒產區兩大酒莊，其中Trefethen Family Vineyards嘅紅杉木釀酒廠建於十九世紀，屬國家歷史地標，一般唔會對外開放，今次佢哋不單止能夠參觀酒莊，仲可以喺莊園內啖美酒，食好嘢，淨係睇佢哋嘅表情就知道幾咁享受。

新西蘭隊最後以七比一嘅總成績擊敗意大利紅月隊（Luna Rossa Challenge），喺路易威登挑戰者系列賽（Louis Vuitton Challenger Series）中奪冠。新西蘭隊即將進入決賽，稍後同衞冕嘅美國甲骨文隊（Oracle Team）爭美洲盃。

第一手消息請下載on.cc東方互動iPhone/iPad/Android/Windows Phone Apps