當一個地方，貧富極度懸殊時，少不免會有「仇富」的現象發生。老老實實，有錢人不一定係邪的，仲有大把善良的好人嘅！社會上谷出仇富情緒，因由很多，政府制度的不公義，和傾斜偏袒財團，令基層向上爬無望所產生之不滿，好易見到，而另一種更叫人齒冷兼喊打的，就係有一群為政權和財閥叫陣之死擦鞋仔，才最乞人憎。

有件長遠房屋策略督導委員會委員劉炳章喺《城市論壇》被人追問，為何要開墾郊野公園（或綠化地帶）起樓，都唔打算讓出（大陸語叫做「釋放」）高爾夫球場部分面積來解決無地問題呢？咁是否只顧住極小部分有錢人嘅享樂，而犧牲大部分普羅大眾的消閒？呢件粉皮劉「理直氣壯」地解說，犧牲小市民福利係唔好，但同樣剝奪有錢人的權益亦唔啱啫！嘩！好勁的語言藝術！佢仲話，香港係一個世界級國際大都會，沒有一個高爾夫球場，咁點似樣喎！吓！幾十萬人無瓦遮頭啦！就係為面子？定係為維護老細晨早打吓波呢？

中港交通融合，路程縮短距離好多，鄰近的觀瀾湖高爾夫球場，乃國際有名到痹的靚場，要招呼外國友好，半粒鐘唔使，心曠神怡啦！

講邏輯，全球國際大都會有嘅嘢，香港都要有，咁就好無特色，並好「傑」啫！人家有賽車跑道、有紅燈區、有賭場、有動物園……香港係咪乜都要有呢？相反，全球任何一笪大都會也沒有黃大仙廟，我哋係咪要拆咗佢呢？

低能反智的委員會在香港廢物政府的縱容下，只會令低下層市民更痛苦，更不滿政府，更仇恨權貴，更分裂社群！啲粉皮吔蕉啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps