SUN搞作：少膽虫手記：「零距離」接觸
《爛果》呢排霉到燶，淫賤黎又叫少膽虫同編輯開集屍會。少膽虫明白險中求勝，所以一定要晒冷︰「腦細，我建議搞同讀者『零距離』聚會，造一造勢！」
淫賤黎一聽大駡︰「少膽虫，點解你咁無腦？嚟得嘅都插我喇，我未畀人鬧過咩？」少膽虫解釋︰「我哋可以請人嚟支持《爛果》，先用旅巴接送、後派飯盒同水，最後再畀啲着數班人，少膽虫保證掂過蛇齋餅糉！」只見淫賤黎眉頭一皺，「咁……好重皮，筆錢……」少膽虫為上位惟有講句︰「腦細你出旅巴、飯盒同水，着數就我出！」淫賤黎見少膽虫咁豪氣，終肯點頭同意。
聚會當日，淫賤黎上台裝正經道︰「歡迎大家蒞臨……」話未畢，就被台下一聲「又話有月餅派，餅呢？」打斷，所謂一犬吠影，百犬吠聲，群情洶湧。少膽虫緩緩上台說︰「我重申唔係我哋唔派餅，而係着數無小事，梗係有排搞，等吓先，明年今日有o架喇！」結果聚會搞唔成，反而變咗格鬥大會……
