政壇：搞搞政：鄭耀棠豪遊懶理工聯「家訓」
自從部分立法會議員豪遊法國嘅風波曝光後，香港迪士尼今年更決定取消邀請議員試玩哈囉喂活動，相信實令唔少貪玩嘅議員失望。不過，工聯會嘅議員郭偉強就冇有怕，皆因工聯會「阿姐」陳婉嫻早就教落，接受得公職就唔好貪小便宜，因此舊年都冇應邀去迪士尼，寧願自掏腰包去玩。
設計圖片及對白
郭偉強向我哋透露，當年大學畢業後加入工聯會做議員助理，嫻姐當時已向佢哋教路，話做得工會就唔應該同商業機構「行得太埋」以避嫌，所以工聯會一直都維持淳樸風氣，直至佢○七年當選東區區議員，依然謹記嫻姐教誨，好似佢選區嘅和富最多福建人，佢哋都好客氣，不時有街坊向佢送茶葉、西餅咁，但佢都堅持唔收，就算街坊夾硬擺低，佢都會轉贈畀老人院或幫佢手嘅義工，總之理直氣壯，免得招人話柄。
嫻姐教得咁好，但唔係人人都明白唔貪小便宜嘅重要，身兼行政會議成員嘅鄭耀棠偕妻豪遊法國返港後死唔認錯，到咗其他議員「回水」謝罪，佢都無動於衷。早前就有讀者以工聯會「一群會員」名義發表公開信，狠批鄭耀棠接受款待厚顏無恥，更唔滿意佢唔顧自己身份都要顧工聯會形象喎！
唔通工聯會嘅「家訓」只適用於需要經歷選舉洗禮嘅民選議員，獲政府欽點入局嘅鄭耀棠就可以打橫嚟行？正所謂「上樑不正下樑歪」，睇嚟鄭耀棠要時刻記住以身作則，唔好要班後輩下下幫你頂先得o架！
