政壇：郭炳聯訪正生勉勵師生
新地聯席董事郭炳聯月前以「郭得勝基金」名義開展咗「陽光計劃」，幫助正生書院全面發展，尋日佢山長水遠去咗芝麻灣正生書院大派中秋禮物，亦送上佢敬師嘅心意。
郭炳聯（中）同新地集團管理層蔡少浩（右）齊向校長陳兆焯（左）了解院舍修葺進度。
郭炳聯行到皮鞋鞋底都蝕晒。
院舍沿斜坡而建，郭炳聯（右二）行到大汗疊細汗。
郭炳聯同員工落船後汗流浹背走過長長斜路，行咗十分鐘，仲帶埋手提電腦、打印機同太太買嘅月餅到該院，又送咗蜜糖畀老師潤喉。佢哋參觀咗修葺中嘅學生宿舍，了解工程進度，郭炳聯盛讚學生髹漆功夫了得，笑言「可以去新地幫手，賺人生第一筆錢」。佢又話唔少人都將注意力放喺學生身上，其實老師都好值得表揚，事關佢哋同學生一齊住，四季都係沖凍水涼，仲要隨時候命，少啲毅力都唔得。
分享父親生活點滴
郭炳聯同師生分享時話，好老師會改變學生一生，又話佢爸爸無論工作幾忙，放工都盡量返屋企一家人食飯，趁機向佢哋分享人生經驗。佢憶述，爸爸經常以身作則教導佢哋，無論面對幾多困難，都從不埋怨同退縮，堅持一份鬥心同意志力克服困難。佢又話爸爸喺醫院嘅最後一刻，都堅持要工作。
