如果講起韓國嘅代表食物,除咗泡菜之外,相信非炸雞莫屬。根據一個南韓財團嘅統計,南韓炸雞店數目喺過去十年增加三倍,每年都有七千多間新店開業,但每年就有五千間炸雞店倒閉。開得咁多皆因當地大企業嘅員工喺五十歲左右就要被迫退休,但退休金又支持唔到生活,惟有焗住做呢啲小生意維持生計啦。但最恐怖係,原來接近一半捱唔過三年,八成會於十年內結業。

由於店舖嘅開業資金都係靠銀行貸款,大量炸雞店令到呢啲家庭嘅負債比率屢創新高,舊年嘅家庭負債比率就佔可支配收入高達百分之一百三十六。自從炸雞市場飽和後,貸款嘅壞帳率愈來愈高,除咗令到家庭嘅消費下降,銀行亦唔願借貸,令到市場資金缺乏流動性,長遠會影響南韓嘅經濟。

 「炸雞店泡沫」睇落都幾恐怖,南韓政府已經投放咗十三億美元,資助超過十五萬名低收入借貸人士,透過延長佢哋嘅還款期,或者撤銷最多一半債務,減低對經濟傷害。

第一手消息請下載on.cc東方互動iPhone/iPad/Android/Windows Phone Apps