政壇：日領事四出為福島闢謠
早前都講過，美國駐港總領事夏千福上任後頻頻約見政界人士，又整埋社交網站上載自己落區探訪相片，比起過往每一任嘅總領事都高調，因此觸怒唔少中方人士，要求佢唔好干預香港事務。其實近排唔止美領事動作多多，連日本駐港總領事野田仁都好活躍，周不時約見政界人士，但佢首要談及嘅議題，唔係政治，而係幫手闢謠。
野田仁（左）早前出席一個活動時與四洲集團主席戴德豐言談甚歡。（資料圖片）
四月到港履新嘅日本駐港總領事野田仁，最近相約議員同傳媒聚會，又單對單會見商界，但言談之間講得最多嘅，唔係釣魚島爭議等敏感議題，而係福島核電站洩漏輻射嘅影響。原來野田仁得悉唔少香港人都驚輻射影響而唔敢去東京等熱門旅遊勝地，所以每次野田仁都詳細解釋，大派定心丸，話福島距離東京幾百公里，根本唔會有乜影響。
至於夏千福當然繼續收風，聽聞佢相當關注政改議題，見親政界人士都問人點睇二○一七特首選舉，例如會唔會有篩選、會唔會畀泛民入閘等。但唔少見過夏千福嘅人都話，自從經過維基解密一事後，大家講嘢小心好多，相信冇乜人毫無保留講晒畀夏千福聽。
