政壇：湯家驊唔熟書瘀爆
政府早前分別推出買家印花稅（BSD）、額外印花稅（SSD）同雙重印花稅（DSD）三項壓抑樓市需求辣招，立法會隨即分別成立兩個委員會審議三條草案。立法會尋日暑假後復會，第十三度審議有「雙辣招」之稱嘅BSD同SSD，打擊非本港永久居民或以公司名義炒樓嘅行為。商界議員繼續要求政府豁免慈善團體同港人公司買樓繳交BSD，但公文袋嘅湯家驊喺問問題時竟然誤將SSD當成DSD，仲要畀政府官員當面揭發佢唔熟書，認真瘀爆。
設計圖片
湯家驊發言話公文袋支持政府推樓市「辣招」打壓炒樓，但之後就無厘頭咁質問當局點解要限制香港人買樓，批評政府徵收DSD係矯枉過正兼卸膊，聽得運輸及房屋局副秘書長王天予一頭霧水。
官員暗寸去錯地方
王天予答話BSD提出目的就係要確保港人置業需要，唔明湯家驊話雙辣招限制港人買樓係乜嘢意思。湯家驊呢個時候仲唔知自己講緊乜，反寸副秘書長「原來我講咗咁耐你都唔知我講緊乜」，王天予惟有指出湯家驊嘅問題屬於DSD範疇，而唔係會上討論嘅SSD，暗寸佢去錯地方問錯問題。
瘀爆嘅湯家驊繼續死撐「係呀，我哋一齊討論吖嘛」，搞到連委員會主席都幫口話立法會有另一個草案委員會審議DSD，婉轉話佢唔應該喺尋日嘅會上問及與議程無關嘅問題。湯家驊雖然改口問當局點解唔可以豁免港人公司繳交印花稅，但已經改變唔到佢開咗十三次會仍然唔知做緊乜嘅事實。
湯家驊本身係資深大律師，但喺前年嘅高官議員僭建風暴中，佢被揭喺大埔康樂園嘅豪宅單位涉嫌僭建玻璃屋，湯家驊當時一度引用佢有份打過嘅一單僭建官司，死撐玻璃屋屬豁免規管類別，後來被其他法律界人士及屋宇署指證出錯，佢至肯認記錯咗。
