請救護要識揸車 消防處阿茂整餅
點樣衡量一個救護員係咪稱職？唔少人會即刻搶答，睇佢救傷扶危表現囉。無錯，呢個係一般正常人嘅答案，不過消防處高層係一班顛三倒四嘅唔正常人士，所以真實答案亦係相當匪夷所思，佢哋判斷一個救護員係咪通過試用期，居然係睇識唔識揸車，你話係咪騎呢吖？
大家可能會話，太一叮會唔會搞錯o架？請救護員唔係請司機，無必要規定識揸車啫，聽落唔多合情理喎。嗱，一啲都無搞錯，就係咁唔合情理，根據現行制度，救護員入職後有三年試用期，如果閣下係未有車牌嘅無證人士，咁就煩咯，入職之路隨即多兩個關卡，先要喺外邊考車牌，然後接受部門嘅救護車駕駛課程，考試合格至可以轉長職。簡單咁講，就算係救人無數嘅神勇先鋒，只要舞唔掂四個轆，一樣無得留低，一身救人本領從此被糟蹋。
考救人變考揸車，梗係多人唔服啦。有前線救護人員炮轟制度不公，批評救護員嘅職責係救人，無理由以識揸車作為長期聘用條件。更唔公平嘅係，消防處強人所難要求救護員喺三年內考完車牌再考救護車牌，相反消防員卻毋須識揸消防車，咁即係大細超啫，唔慶就假啦！
最離譜嘅係，消防處超乎常理咁睇重救護員嘅駕駛技能，大家咪以為佢哋好重視救護車嘅駕駛安全呀，事實啱啱相反。據本報了解，所謂嘅救護車駕駛訓練為期只有三個星期咁大把，而且僅屬一般路面訓練，同現實中經常衝燈越線爭分奪秒救人嘅驚險情況嚴重脫節，救護員欠缺足夠培訓，有訓練即係等如無訓練，分分鐘能救不自救吖！
唉，講到呢度，只能用一句話嚟形容消防處嘅招聘及訓練亂象，就係：不知所謂。第一步招聘救護員以識唔識揸車作為取錄條件已經阿茂整餅；第二步訓練駕駛救護車更加係紙上談兵，救護員即使考試過關亦係一個欠缺路面實戰經驗嘅初哥，消防處究竟係救人定害人吖？
所以話啫，綱紀一亂，何事不生。消防處管理混亂，醜聞多多，又其身不正多次違反防火條例，又渾噩無能不斷買錯救火設施，處長陳楚鑫更加帶頭違規亂過馬路，座駕不顧安全胡亂切線，成個部門烏煙瘴氣，簡直好似一架無人駕駛嘅救護車，橫衝直撞，亂七八糟，招聘及訓練救護員亂象叢生，太一叮一啲都唔覺得奇怪囉。
係呢，消防處近來充當打壓新聞自由嘅急先鋒，遲啲會唔會要求救護員識得箝制言論自由至畀入職呢，叮！
