城中鏡：王健林膺中國新首富
二○一三年胡潤百富榜尋日公布，有內地「商業地產教父」之稱嘅萬達集團董事長王健林，以一千三百五十億元人民幣身家，撼贏娃哈哈董事長宗慶后，成為中國新首富。今年嘅排行榜上，地產富豪佔比超過百分之二十三，重新成為上榜人數比例最高嘅行業，胡潤話最重要都係因為地產業相較舊年已「整體復甦」喎!
王健林成為中國首富。（資料圖片）
福布斯中文網幾日前率先預告，王健林身家已去到一百四十億美元，坐上中國新首富寶座。尋日公布嘅胡潤百富榜更加推斷，王健林嘅財富喺過去一年暴增咗超過一倍，去到一千三百五十億元人仔，去年嘅首富宗慶后家族，財富雖然都增長咗百分之四十四去到一千一百五十億元人仔，但仍要退居第二位。至於第三位係騰訊老總、四十二歲嘅馬化騰，排名上升四位，第一次進入三甲，同時都係前十大富豪中最後生嘅一位。
貴為首富，王健林嘅投資遍布全球，內地網站乘機問佢，和黃大規模投資英國，係咪撤資嘅行為？佢話唔清楚和黃要投資英國，萬達除英國外，都有其他地方嘅投資，但核心都係中國。
