城中鏡：阿松訪雲南小伏未隨行
早前見到國際小母牛香港分會主席「阿松」梁錦松、太太「小伏」伏明霞等城中名人喺上環一間米芝蓮星級食肆，為小母牛年度籌款晚宴助陣。阿松話後日將率團到雲南少數民族村落探訪農戶，一向夫唱婦隨嘅小伏就冇得去，事關三個小朋友已開學，佢要留港照顧子女。
葉澍堃太太（前排左起）、伏明霞、藝人葉童，同一眾靚太靚女歡聚。
郭少明（右起）特登帶埋放暑假返港嘅囝囝Patrick去撐梁錦松。
晚宴籌款成績咁好，杜振源（左起）、王庭聰同「拍賣官」葉澍堃開心飲勝。
阿松話自○五年加入小母牛至今已八年，每年必定前往內地偏遠農村探訪，有時一年去三次咁多。雖然探訪旅途艱辛，但佢好享受，尤其係第二次回訪時感觸更深。佢話通常初次為受助農戶送上牲畜時，農戶表情總係徬徨無助，惟兩、三年後，牲畜繁衍下一代，受助者變成施贈者，成個過程唔止自己脫貧，仲可以幫番人，搵番自信心，令佢感覺好振奮。
王麗霞峇里島行婚禮
小母牛籌款委員會主席兼「快勞夾大王」Simon杜振源、副主席王庭聰、馬會大董葉澍堃同莎莎老細郭少明都在場。即將披嫁衣嘅王庭聰女兒Crystal王麗霞亦同男友Jimmy到場，Crystal講起婚事喜上眉梢，下個月兩人先喺香港註冊，明年初至移師印尼峇里島舉行婚禮，到時將宴請三、四十名親友飛去見證浪漫一刻。
同國學大師饒宗頤熟稔嘅王庭聰，出動大師寫下「量寬福厚」墨寶以供拍賣，成為當晚拍賣環節嘅高潮，連小伏都舉手叫價。經過一輪熱烈競投，最後由善心爆棚嘅Simon以五十萬元投得。加埋一眾善長自揼心口競投美酒及鑽飾等，話咁快籌得三百五十萬元善款。
