政壇：搞搞政：追殺貪湯 立會無手軟
「貪湯」前廉政專員湯顯明被揭發任內豪花公帑大量買酒，又以公務為由周圍遊埠。立法會政府帳目委員會公審完貪湯後，已經密鑼緊鼓寫緊報告。
設計圖片及對白
由政府成立嘅廉政公署公務酬酢、餽贈及外訪規管制度和程序獨立檢討委員會，今個月初亦已經完成報告，政府諮詢完法律意見後好快公布。貪湯貪腐醜聞令人髮指，咪以為事件咁就告一段落，立法會另一個針對貪湯嘅專責委員會將會喺下月三日召開會議，相信將掀起新一輪追殺貪湯行動。
帳委會公審完貪湯之後，貪湯事件就好似沉寂一時咁，廉署收到政黨有關貪湯嘅舉報後亦一樣係冇聲冇氣。唔通咁就畀貪湯走甩、逍遙法外？
貪湯打爛香港嘅廉潔招牌，當然唔會咁易畀佢甩身。由立法會議員郭榮鏗同何秀蘭透過提交呈請書嘅方式成立嘅調查湯顯明任職廉政專員期間的外訪、酬酢、餽贈及收受禮物事宜專責委員會，進行咗約兩個月嘅籌備工作，未等立法會下月九日復會，就已經決定喺復會之前開第二次會議，討論點樣調查貪湯喇。
專責委員會預計會用五個月研訊同取證，最快明年五月提交報告，期間唔排除會再次傳召貪湯去立法會o架。
