政壇：副局政助訪京領隊成謎
呢排好多問責官員排住隊訪京，繼保安局局長黎棟國本月初率領五大紀律部隊首長訪京獲國家領導人會見，公務員事務局局長鄧國威亦正率領常任秘書長團訪京。
據聞一批副局長同政治助理也不甘後人，最快喺中秋節後北上訪問，不過唔似得紀律部隊團同常秘團有問責官員帶隊，據聞暫時副局、政助團未有司、局長級官員帶隊，或會退而求其次要挑選資深副局長做領隊。
事實上，副局同政助北上訪問非首次，因為二○一○年九月，十六名副局、政助由時任特首辦主任譚志源帶隊訪問上海四天，當時獲時任港澳辦副主任華建設宴款待。事隔三年之後，副局、政助有機會再次北上，不過今時不同往日，唔似當時有譚志源帶隊，現任特首辦主任邱騰華暫不在名單之列，到時一眾副局、政助似乎要一腳踢喇。
至於副局、政助團嘅領隊人選，據聞暫時係由副局長出任，資料顯示依家政府有八名副局長，有人估計或會有較為資深嘅副局長出任，不過政治一日都嫌長，臨到出發前會唔會突然有「升格」安排，呢個大家要拭目以待喇！
