政壇：星屑醫生iPhone五色喻政黨
喺上屆立法會九龍西直選落敗嘅人民力量「星屑醫生」歐陽英傑，尋日藉蘋果公司出綠、藍、黃、紅、白五種色嘅iPhone 5C，就喺社交網站話，頭嗰四隻色分別係白鴿黨、建仔、人民力量同社民連嘅顏色喎！不過，新民主同盟嘅范國威唔執輸，留言話隻黃色亦係新民主同盟嘅色。咁白色又係點呢？星屑醫生就問，係咪愛護香港力量嘅顏色呢？估唔到星屑醫生會咁掛住愛港力，莫非不是冤家不聚頭？
慢必變獨眼龍
除咗佢哋喺網上熱論之外，仲有網民話藍色似係富貴黨嘅色多啲。有一名疑似社民連成員話，社民連嘅顏色唔係桃紅色，而係玫瑰色，另有網民話夾埋晒啲顏色，最啱「慢必」，即係人力嘅立法會議員陳志全喎。
不過，講起慢必，佢尋晚喺社交網站亦上載咗張左眼貼住膠布嘅「獨眼龍」相片，話啱啱去割完眼瘡。
但好人好姐點會生眼瘡o架，莫非睇咗啲唔應該睇嘅嘢？
