政壇：謝偉俊隨時變西環曳仔
由早年嘅「法律超人」，到○八年爆冷當選旅遊界功能組別議員，舊年再變身成九龍東直選議員，「西環契仔」Paul謝偉俊嘅從政路途都算充滿傳奇。但自從阿Paul呢一年屢次開腔批評特首CY梁振英後，據聞佢都擔心來屆選舉無運行，得唔到西環力撐。咁啱最近同佢同聲同氣嘅富貴黨又力邀佢入黨，雖然阿Paul目前未有答應，但聽聞佢都想同富貴黨保持友好合作關係，萬一下屆選舉時失去西環「祝福」，都可以加入富貴黨，由契仔變「曳仔」大講良心說話。
謝偉俊話未決定加入政黨。（資料圖片）
舊年阿Paul由立法會旅遊界轉戰九龍東直選時，獲得高人祝福，令九龍東十幾位建制派區議員群星拱照佢，最後成功當選，但佢近半年言論都不時批評特首CY梁振英，到底喺西環心目中，佢仲算唔算「西環契仔」，已經成為一大疑問，近日阿Paul仲開到口話CY未能團結建制派，批評力度似乎愈嚟愈大。
由於阿Paul同富貴黨田北俊槍口一致對準CY，政界盛傳田少多次力邀佢入黨，將佢由西環契仔打造成西環曳仔。
阿Paul大方承認自從舊年選舉後，雙方都有傾過，但未有結論。由於田少下屆未必再選，令富貴黨本身都面對無人接棒嘅困境，如果獲得阿Paul加盟，起碼多個直選議員坐鎮黨內，但距離下屆選舉仲有三年幾，現時講乜都言之尚早。
