政壇：科大辦家長日 雷鼎鳴力撐
依家好多「直升機」家長同怪獸家長，（目及）實啲仔女，好似早幾日大學相繼開學，都見到好多家長陪仔女返學，情況令人憂慮。
設計圖片及對白
正如亞洲排名第一嘅香港科技大學月底首次舉辦家長日，校長陳繁昌仲出通告連「回條」，邀請家長回覆係咪出席，差在未使家長簽名，引發一眾大學生同「老鬼」議論紛紛。
查探仔女近況 求見教授
中文大學校長沈祖堯早前回應呢個問題時，佢認為學校係有需要同家長溝通嘅，而舉辦活動同家長交流並冇問題，事關外國院校亦有舉辦類似嘅活動，所以唔可以一概而論，如果將活動易名做「交流日」，或者可以減少標籤咁話。尋日輪到科大商學院副院長雷鼎鳴開腔力撐，話相當支持校方搞家長日，仲反諷力圖阻止家長出席嘅大學生先係「小學雞」添！
唔少大學生擔心家長「入侵」校園令大學「小學化」，雷教授解釋，唔少美國著名大學都會舉辦家長日，當地學生亦相當重視呢個親子機會，科大只係跟隨呢套制度，唔明白本地學生點解咁驚「見家長」，笑言「大家唔好將童年陰影帶到上大學」，家長日正正就係畀家長同仔女講聲「再見」，未來四年放心將個仔交託畀校方，唔使日掛夜掛。
雷教授仲透露，科大轉制第二年先搞家長日，係鑑於上年好多家長唔放心仔女喺學校嘅生活，成日打電話、親身到學校查探仔女近況，甚至要求見教授，坦言校方都係為咗釋除家長疑慮，希望舉辦完家長日，家長排隊條龍冇咁長，亦唔使聽咁多電話喇！
