覓地大計可以傾 最怕官弱事難成

太一叮講緊邊個？咪就係發展局局長陳茂波囉。佢喺網誌問喎，香港土地供應緊絀，郊野公園係咪全部碰都唔碰得喎？佢仲特別點名大嶼山郊野公園用地，問係咪全部唔可以發展，擺明想為開發呢片綠化地帶試水溫。你知啦，郊野公園向來被視為發展禁地，係忙碌香港人吊頸都可以抖吓氣嘅人間淨土，當局搶地嘅測試氣球一出，即刻被環保人士轟爆，直斥建議不切實際，根本無法通過環境評估及城市規劃條例等限制。

當局試水溫變引火燒身，尋日急急補鑊話，陳茂波只係想同市民分享部分社會人士嘅意見，以供思考同討論，並非代表政府立場喎。你話嘞，吹水唔抹嘴已經係港產官僚最大強項，依家居然弱勢到連吹水都畀人掌嘴，闢地建屋喎，發夢冇咁早啦。

即係咁，地係死嘅，人係生嘅，社會發展以民為本，發展郊野公園用地其實唔係唔可以討論嘅。係人都知，房屋同土地就係麵包同麵粉嘅關係，最近當局提出未來十年興建四十七萬個房屋單位目標，一下子要供應咁多麵包，麵粉從何而來呢？呢個問題無法迴避，大家遊覽郊野公園時，係咪應該一邊行山一邊諗諗？

當然啦，打郊野公園主意未必係最佳辦法。官老爺應該記得，當年擴建將軍澳堆填區又係打郊野公園主意，結果眾怒難犯，搞到焦頭爛額，今日重施故技，只怕又衰多次咋。更何況，環保人士唔係無道理o架，改動郊野公園土地用途涉及環評等法定程序，拗得嚟都天光啦。

開講有話，條條大路通羅馬。闢地建屋其實好多路行，唔一定要向郊野公園開刀嘅啫。好似新加坡咁，最終咪靠填海填出一條令國民安居樂業嘅康莊大道，點解香港唔可以呢？事實上，香港過去就係以填海不斷開創新天地，中環、銅鑼灣、沙田等都係填海而成，點解今日反而故步自封呢？嗱，維港兩岸動彈不得，咪研究其他地點囉，總唔信成個香港搵唔到一個適合嘅海灣喎。

一句講晒，香港唔係無地，亦唔係無開拓土地嘅方法，只係無實幹有為嘅官員啫。咁嘞，如果官老爺真係覓地無計，太一叮建議你哋向一個郊野公園開刀，邊度？咪就係「爛鬼坊大濫交野公園」囉，嗰度早已淪為人間妖域，剷平佢包保無人反對o架，叮！