城中鏡:唐雙寧宋林現身光証酒會
早喺光大証券發生烏龍盤之前，傳媒已收到光大集團成立三十周年慶祝酒會嘅請帖，寫到明光大集團董事唐雙寧會主持酒會，光証事件後，都有啲擔心佢會唔會縮沙唔嚟，尋晚終於揭曉，唔單只見到唐雙寧，仲有久未露面嘅華潤集團董事長宋林，兩位新聞人物神采飛揚，睇嚟冇乜受負面消息影響。
唐雙寧
宋林
除咗光証事件困擾集團之外，西方傳媒早前仲報道，摩根大通透過聘用唐雙寧之子，而取得光大銀行業務利益，摩通正受到美國監管機構調查，再加埋烏龍盤事件，唐雙寧頓成新聞人物。記者見到佢，即刻撲埋去想傾幾句，但佢揮吓手就算數。至於另一新聞人物，宋林嘅出現，就令人有點驚喜，佢早前被舉報捲入貪腐案，之後好少喺公開場合出現，但話晒都係光大嘅主場，為免搶人風頭，佢揮完手就匆匆入場喇，完全唔畀記者埋身嘅機會。
唐雙寧喺致詞時總結光大集團三十年嘅發展歷程，又話喺集團前進嘅道路上仍有曲折，但反而更有信心。
