城中鏡:李文斌偷胡楓靚橋瘦身
前日喺沙田馬場遇到理文造紙太子爺Edmond李文斌，驚見佢身形大縮水，肚腩失咗蹤，面頰都變尖咗，原來佢都係靠圍住飯枱急步行瘦身，短短個半月就瘦咗十七磅喇。咦！藝人「修哥」胡楓曾自爆每晚臨瞓前都會圍住床邊行個幾兩個鐘，所以身體到依家都仲咁健壯，唔通Edmond偷修哥橋？
李文斌經過今次地獄式減肥，身材明顯清減。
Edmond月前至「升呢」做公司行政總裁，仲以為佢因壓力大而暴瘦，原來佢由七月底開始見營養師減肥。聽取過專業建議後，佢開始每日飲兩點五公升清水，減少每餐澱粉質攝取量，再分別於午飯及晚飯後，沿住飯枱快走四十五分鐘，加埋剛剛好行咗一萬步。
為騰出午飯時間運動，佢寧願扒快兩啖飯，日子有功之下，佢由一百七十磅減至依家一百五十幾磅，衫褲鬆晒要拎去改，但佢仍未滿意，希望再減多五磅。究竟有乜原因推動佢積極減肥呢？佢就話冇特別原因，只係覺得自己真係太肥喎！
