政壇：搞搞政：雙辣招表決白鴿慌失失

有白鴿黨中人坦白講，唔少白鴿人都覺得港人公司應豁免買家印花稅，否則好多港資中小企都要硬住頭皮交重稅，到時BSD就變成殺錯良民兇手。但黨內最近又有人話，今次修訂係由地產及建造界議員石禮謙提出，如果白鴿黨認同修訂，好容易令人有「民主黨撐地產商」嘅錯覺，日後選舉時分分鐘會火燒後欄。白鴿黨近期已成驚弓之鳥，尤其係國泰包機豪遊事件，白鴿黨就被外界狂轟雙重標準，基本上佢哋每行一步都擔驚受怕，所以就算有資深白鴿仔覺得修訂有理據，都唔敢貿貿然表態支持。

究竟白鴿黨嗰六票點投？佢哋嘅黨團會議周四就會主力傾BSD，聽講曾經做過白鴿黨副主席嘅運輸及房屋局局長張炳良知道該黨舉棋不定後，立即要求出席黨團會議，仲講明有乜疑問都會解答。唔知同昔日戰友會面後，白鴿黨會否支持政府呢？

同政府打對台嘅地產商亦唔係坐以待斃，消息指最近地產建設商會不停私下約見部分泛民直選議員，希望佢哋支持石禮謙提出嘅修訂，公文袋某大狀更成為落嘴頭主要目標，但消息指游說唔多奏效，原來公文袋嘅理由同白鴿黨一樣，所以如無意外，公文袋都會支持法案原封不動通過。