政壇：王健林躍升中國首富
呢半年嘅變化真係好大，福布斯中國富豪排名就係鐵證。今年三月福布斯公布全球富豪排名榜，以中國富豪呢個排序，娃哈哈董事長宗慶后係中國首富，當時身家一百一十六億元（美元．下同），大連萬達集團老闆王健林就以八十六億元排行第二。事隔半年，王健林嘅身家已大躍進去到一百四十億元，超越宗慶后。呢個係福布斯嘅最新估算，好快就會有最新嘅排名榜出籠，次序應該唔會點變。
王健林正打算喺北京搞博物館。（資料圖片）
王健林做首富其實有迹可尋，上個月彭博全球億萬富翁排行榜，王健林以一百四十二億元身家，力壓宗慶后，成為中國新首富，兩者嘅差別係三十二億元。
其實佢「百足咁多爪」，除咗購物中心、酒店之外，旗下仲有萬達百貨同埋豪華遊艇製造公司Sunseeker，而且萬達集團又喺一二年斥資二十六億元收購美國嘅電影院經營商AMC，今年又買埋香港上市嘅恒力商業地產，依家改埋名叫萬達。佢另一個身份係收藏家，其中一個嗜好就係收藏藝術品，正打算喺北京搞一間博物館。
