政壇：郭樹清為山東金融業招才
俗語有云：「新官上任三把火」，中證監前主席郭樹清成為新任山東省長之後都有把火，之不過唔係怒火嘅火，而係一把對金融業嘅熱情之火！
郭樹清
聽聞郭樹清入省無耐，就揚言要「將山東省打造成金融中心」，並且對當地嘅金融發展狀況摸底，半年不到佢已經開始埋手「改革」，首要工作就係「招才」。當大家聽見郭樹清話「每個市都要配一個懂金融的副市長」、「從中央金融機構抽調三十名幹部到山東掛職」之後，隨即成為各大金融機構茶餘飯後話題。加上當局通過「處級幹部到山東即可擔任副市長」決定，為唔少年輕處級幹部，提供咗優秀嘅晉升機會。
唔少「報名者」都係嚟自人民銀行、證監會、銀監會同保監會，佢哋仲話就算無得晉升，單係賺經驗都值得。內地媒體透露，目前已有五名證監高官被挖角，預計名單仲陸續有嚟。
