政壇：吳文遠敗選一年先謝票

其實吳文遠喺社運界嚟講，算係青靚白淨斯斯文文，加上講嘢有紋有路，照計應該吸盡唔少師奶票同學生票，但佢唔知係選舉部署錯誤，定係太遲起步，最終只得嗰三千幾票，令人大跌眼鏡。尋日咁啱係選舉一周年，佢特登係社交網站上載一張當年選舉論壇時嘅相添!

吳文遠話從來無灰心，只係發覺時間過得咁快，估唔到咁就一年，佢話一年前有一班「超級助選團」幫自己日夜拉票，所以想再多謝佢哋一次，佢仲話上年自己形勢大落後，全程無人睇好，但仍然有三千幾人獨具慧眼、寄予厚望投票畀佢，證明呢三千幾人一定非池中物，所以自己亦唔會放棄，一定會繼續努力向前走。佢仲講笑話，既然呢三千幾人咁有眼光，如果佢哋可以每人幫佢拉多十票，咁三千幾人乘十，就即係三萬幾票，絕對夠佢入立法會o架嘞。