政壇：波波謀地不成變「波縮」

搵地搵到頭都大埋嘅波波前日喺官方網誌提到，早前聽到有意見認為，喺土地供應緊絀嘅情況下，係咪可以考慮發展郊野公園用地，仲話全港有成七成土地係郊野公園，係咪全部都唔可以碰、唔可以傾呢？此話一出，難免令人覺得佢想打郊野公園主意，唔少環保團體同土地政策團體都表明反對。

為咗撲火，發展局尋日就發稿解畫，話局長只係引述講座和座談會上出席者認為可考慮發展郊野公園用地嘅意見，強調唔係代表政府立場，又承認網誌中刊登嘅數字有誤，郊野公園用地係佔全港四成土地而非七成。

全日冇露面解釋

不過，波波尋日全日龜縮，冇露面親自解釋，但身處貴陽出席泛珠三角區論壇嘅特首梁振英要幫佢解畫，話政府無改變郊野公園政策，波波亦只係反映社會睇法，但係佢承認房屋係香港嚴重嘅社會問題，為咗土地供應，全個社會响改劃土地或提高密度方面都要作出困難嘅抉擇。

環境局局長黃錦星被問到係咪發展郊野公園，佢話郊野公園受完善嘅法例保護，政府冇既定立場去改變現有機制，而波波亦只係轉達社會人士嘅意見，至於點樣平衡保育和發展，就要多聽社會意見。