收數禍及諮詢人 財仔擾民無王管

近年財務公司生意做到通街通巷，借錢易過借火，打個電話即時搞掂，結果自然出現唔少走數嘅個案。本來呢，欠債還錢天公地道，可惜現行法例粗疏，監管又唔到位，唔少財務公司將諮詢人當追債對象，以不同手法滋擾，唔只牽連家人，甚至連諮詢人嘅僱主都唔放過。最無辜嘅係，好多市民做咗諮詢人都唔知，失驚無神畀人追債，飽受恐嚇及困擾，你話唔驚就假。

點解會搞成咁？原來，唔少財務公司批核貸款嗰陣，要求借貸人提供諮詢人資料，但係就好少查證諮詢人係咪自願。於是部分借貸人未得到同意就將親友列為諮詢人，將住址、電話號碼以及任職公司等個人資料統統畀晒財務公司。一旦債仔走佬咯喎，財務公司有理冇理先搵諮詢人，上門恐嚇又有，以電話騷擾又有，令人不勝其煩。

呢，有間公司一周內每日收到十幾個追數電話，原來有職員嘅親戚向財務公司借咗錢，而佢本人仲懵然不知，結果連累埋自己嘅公司受到池魚之殃。亦有人懷疑畀同事當諮詢人，惹來財務公司登門恐嚇，甚至喺屋企大門寫紅字追債。最離譜嘅係，有僱主因為外傭做咗同鄉嘅諮詢人，而不斷受到電話滋擾，真係無妄之災。

講到收數亂象，呢啲都只係冰山一角咋。淨係今年上半年，警方就接到五千幾宗涉及財務公司滋擾恐嚇嘅舉報，平均每日超過七宗。消委會今年頭七個月接獲涉及個人貸款嘅投訴，亦較舊年同期增加超過三成。好明顯，收數亂象已經瀕臨失控。

財務公司追債好正常，問題係，根據現行《放債營運守則》，諮詢人只係向貸款公司提供貸款人資料，根本冇義務幫貸款人還款。正如有法律界人士話齋，諮詢人唔知情，無簽名，法律上責任係零，係財仔搞多個名堂，目的係索取更多債仔親友資料，以便日後追數。

即係話，財務公司要求諮詢人代債仔還錢，既不合情亦不合法。諮詢人無辜被滋擾嘅情況愈來愈嚴重，好明顯係法例存在漏洞，對諮詢人保障不足，搞到財務公司追債手法愈來愈激，淋紅油、寫大字、恐嚇等等，無所不用其極。早排馬來西亞有大耳窿追債，居然掟汽油彈燒屋，簡直收買人命。港府咪以為唔關香港事吖，如果對收數亂象繼續坐視不理，隨時搞出人命o架，叮！