SUN搞作：SUN官場現形記：盲搶片？
李衞尋日行街經過藥房，見到門口條人龍水蛇春咁長，心諗明明限奶令都未撤銷，點解又有人「盲搶奶」？再睇真啲，居然畀我見到局長黃星星推住架手推車走出嚟，於是李衞即時狗衝埋去抽水。
李衞：黃局長！轉行做水貨客走奶粉呀？
黃星星︰邊……邊度係！我見出咗隻新嘅紙尿片，買番幾包嚟傍吓身啫！
李衞：紙尿片你都啱使？
黃星星︰無，見早排滲滲哋咪試吓新嘢囉！
李衞：估唔到局長你有啲咁嘅隱疾……
黃星星︰唔好亂噏！我幫堆填區買咋！
李衞：你失禁又關堆填區事？
黃星星︰你誤會啦！聽聞呢隻新紙尿片厚過高官面皮，我諗住買幾包貼喺個污水池底，咁就唔怕滲漏喇！
李衞：#^&#%@*&$^@*&$^!!!
