繼前高官馬時亨前日炮轟白鴿黨對接受商界款待問題雙重標準後,尋日輪到前行會成員林奮強發炮,狠批泛民主派濫用制度,仲一次過不點名鬧晒白鴿黨、公文袋同動輒喺立法會拉布嘅激進泛民。

設計圖片及對白

廉署早前決定唔會就林奮強被指「偷步賣樓」事件檢控任何人,但佢最後仍以保護家人為由劈炮唔撈。其後特首梁振英不點名要求曾到廉署舉報林奮強嘅白鴿黨總幹事林卓廷,應向林奮強公開道歉。不過林奮強尋日喺報章撰文,自言唔會期望舉報過佢嘅人同傳媒道歉,擺明暗寸白鴿黨、林卓廷同有關傳媒嘅道德標準低,對佢哋全無期望。

林奮強批評近年部分政黨人士同傳媒發動「公審風氣」,經常對政府高官同公職人員未審先判,包括以「疑似指控」將佢同家人直接當做罪人,不斷玩跟蹤,就連佢八十幾歲嘅媽媽同十幾歲嘅囝囝都搞埋。作為「疑似指控」嘅「最大受害者」,佢誓言若曾利用一啲「疑似指控」影響咗某人一家嘅日常生活,而最後又證實對方係清白嘅,佢定會第一個走出嚟道歉。

對於林卓廷質疑「道歉論」等同向廉署施壓,林奮強直斥係不合理,因若政府向廉署施壓,理應喺調查階段做嘢,無理由等到廉署結案,先至公開施壓咁戇居。

林奮強又盛讚廉署對佢嘅調查專業公正,但警告任何良好嘅制度都可能會被別有用心嘅人濫用,又指有議員濫用立會議事程序對長者生活津貼撥款「拉布」,有人就港珠澳大橋工程提出司法覆核,導致工程費上升六十多億元等,令廣大長者同納稅人受害。

林卓廷傍晚發表聲明死撐話,如果佢嘅舉報係全無根據,廉署就唔會立案調查喇,反斥林奮強係「自招罪嫌」,無資格以「受害者」自居。如果林卓廷真係咁公正,唔該佢立即就其黨員何俊仁、涂謹申同單仲偕「自招罪嫌」接受商界款待嘅醜聞,拉橫額到廉署報案喇!

第一手消息請下載on.cc東方互動iPhone/iPad/Android/Windows Phone Apps