獨立監察警方處理投訴委員會(監警會)除咗主席外,其他委員都係每兩年一任,所以委員即將喺明年換屆,而秘書長亦會喺明年換人。咁啱秘書長朱敏健最近指早前旺角行人專用區舉行嘅撐警方集會係「政治活動」,結果收到幾百個投訴,被質疑「未審先判」,究竟事件會否導致佢被叮走呢?據聞佢不單無事,仲好大機會延任兩年。

有了解監警會運作人士透露,其實喺朱敏健發表「政治活動」言論後,監警會內部已有唔少聲音,覺得佢喺事件上的確講得太多。但亦有唔少委員認為佢同今屆委員間合作無間,而且考慮到監警會內部分工好有條理,就算要成立獨立委員會嚟調查事件,同朱敏健有冇能力再擔任秘書長係兩碼子嘅事。加上要等獨立委員會得出調查結果,都係一年後嘅事,所以搵朱敏健連任秘書長係最好嘅安排喎!

第一手消息請下載on.cc東方互動iPhone/iPad/Android/Windows Phone Apps