政壇：啟剛搵高永文幫手湊仔
香港青年聯會日前舉行新一屆就職典禮，初為人父又榮升主席嘅霍啟剛，成晚表現風騷，大方任影兼有問必答。佢話屋企多咗個新成員之後，更加體會到青年工作嘅重要性。問佢有冇幫手餵奶？佢就笑笑口話：「老婆餵人奶，我點幫手呀？」
周沁（左一）接棒做賢慧社主席，珠寶公司太子女吳嘉淳（左二起）、副秘書長林玉茵同會員梁煒茵齊現身打氣。
霍啟剛「升呢」做爸爸，以後可以同鄭志剛交流吓湊仔經。
啟剛話做咗爸爸固然開心，但有好多細節同禁忌要學。媽媽朱玲玲好有心思，送咗部單鏡反光相機同大光圈鏡頭畀佢，等佢影囝囝影得靚啲。當晚食物及衞生局局長高永文同副局長陳肇始都有出席，陳肇始入政府之前係護理學教授，啟剛講笑咁話，第日湊仔遇到問題都會搵佢哋幫手喎，高永文就話歡迎之至。
在場嘅全國青聯副主席鄭志剛同海味大王女兒余雅穎結婚三年多，一直保持低調，據聞早就做咗爸爸添！問佢做咗爸爸未？佢就答話：「做咗喇，做咗兩年喇！」但當追問究竟係生仔定女時，佢把口始終都密實。
今年初結婚嘅會董潘偉業同太太Akiko鄺晶晶都有現身，明顯肚凸凸嘅Akiko甜笑宣布已懷三個半月身孕，日前照咗超聲波，醫生話九成機會係女，老爺潘少忠好開心，應承會送間豪宅畀佢。
