政壇：建仔公記兄弟鬩牆
建仔同公民力量（公記）呢對政壇好兄弟曾經合作無間，但自公記舊年立會選舉派員同建仔對撼後，兩兄弟關係已大不如前。
設計圖片及對白
話說沙田區議會發展及房屋委員會前日討論當區擬建公屋及居屋發展項目，政府建議調高沙田碩門邨二期、馬鞍山欣安邨二期、火炭禾上墩街居屋項目等發展密度，地積比率由原本唔多於五倍，調高至五點八倍，意味住每棟樓起高約十層。此舉滿足政府要求之餘，區會內佔多數嘅公記又首肯，順利過關應該話都冇咁易，點知竟然殺出建仔呢個程咬金。
肥水不流別人田
建仔彭長緯率先指出，本港住宅用地發展密度一向限制喺地積比率五倍以內，狠批房委會為咗起多一千幾百個單位而打破常規，係「程序上錯」，要求擱置有關討論，唔少黨友都附和，唔想沙田成為「第二個將軍澳」屏風樓咁話。公記當然反對擱置啦，而一向反對政府「盲搶地」嘅新民主同盟就破天荒同公記企同一陣線，話可以逐個項目討論喎！
建仔點解孤軍作戰，都要反對政府嘅建議呢？有區會中人分析，呢四幅擬發展地皮現時分別由公記、新同盟等政團瓜分，所謂「肥水不流別人田」，相信建仔寧願先擱置發展，「以時間換取空間」都唔想幫對家嘅票倉加選票喎。但區內亦有另一種講法，話今次四個項目，最快都要一八年先起好，所以未必同一五或一六年兩場選戰有關，反而建仔今次力抗政府，主因係為免被政府再跣多鑊，擔心一旦加大沙田地積比率成先例，缺地嘅政府就會陸續喺沙田建屏風樓，最後居民就會入晒佢哋數。
雖然建仔提擱置討論呢個動議最後被大比數否決，但單係呢場罵戰已經花咗兩小時，最後仲流會，政府嘅建議要兩個月後再議喇！兩兄弟變咗狗咬狗骨，唔知公記理事兼區議會主席何厚祥有乜感受呢？
