城中鏡：攀山高手鼓勵挑戰極限
恒生銀行早前邀請咗世界級攀山專家John曾志成主講「挑戰無極限」講座，向員工分享挑戰極限心得，同講述佢喺七大洲攀山嘅心路歷程，鼓勵員工冇嘢係mission impossible o架！阿John除咗係第一位由南北兩坡先後兩次登上八千八百四十八米高珠穆朗瑪峰嘅香港人，仲創出最快攀上八千一百六十三米高嘅馬納斯魯峰嘅世界紀錄添！
曾志成（右）帶同登峰時所穿的攀山鞋分享經驗，張樹槐（左）亦向佢取經。
恒生好幾個高層都參與講座，包括薛關燕萍同馮孝忠呢兩位執行董事，仲有傳訊及企業可持續發展總監張樹槐、私人銀行及信託服務主管陸庭龍。
阿John話：「每次登峰都要着上成五十磅重嘅裝備，同孭一百二十公升容量嘅背包，仲要喺海拔高嘅地方活動，真係幾艱辛o架！」大部分出席講座嘅「賓卡」同員工平日都坐喺office唔多運動，聽到佢嘅「辛酸史」都大感佩服。最後阿John勉勵員工，要將自己認為不可能完成嘅事付諸實行，佢嘅鼓勵咁振奮人心，唔知各位員工做嘢會唔會爽手啲呢？
