城中鏡：項明生恨去慈山寺靜修
尋日係初一，最宜食齋禮佛，淨化心靈。旅遊作家James項明生尋日應大埔洞梓慈山寺邀請，偕同幾位專欄作家入寺半日遊。慈山寺仍未正式開放，佢得以一睹其神秘面紗，期間參觀七十六米高嘅青銅觀音像、禪修室、鐘樓同園景，中午食埋齋菜先離去。
項明生雙手合十，在青銅觀音像前留影。（受訪者提供）
戶外庭院鋪設嘅地磚，指定要留有隙縫讓雜草生長。
慈山寺布局清幽，係一個禪修嘅好地方。
項明生決定等寺院開幕後去短期靜修。
James話尋日上午佢哋幾個人應邀入寺參觀，由於仍未裝修完，所以有啲地方仍然係禁地，例如青銅觀音像嘅內部格局。不過佢哋就得以一窺早前因工程糾紛，而被描繪為高度設防嘅禪修室。佢話嗰間禪修室唔似傳說中咁豪華，裝修用色偏好灰黑等暗色，附設廁所，成個感覺似三星級酒店。
睇到唔捨得走
原來唔單止禪修室夠神秘，佢話戶外庭院使用嘅地磚都特別講究，除咗選用外國靚地磚外，喺鋪設時仲特別喺地磚之間留有隙縫，以便雜草從隙縫中自然生長，大有生生不息之意。撇除八卦心態，佢覺得成個寺院確係難得嘅人間淨土，又話寺院位於小山坡上，背山面海，感覺好清幽，一啲都唔似身在香港。
佢好享受慈山寺嗰種寧靜，直言睇到唔捨得走，決定等寺院開幕後去短期靜修。佢話雖然自己唔係佛教徒，但都曾去韓國寺廟靜修，亦跟從一行禪師靜修過，深深感受靜修有益身心。不過香港好缺乏靜修之地，要去到鄰近嘅台灣、日本及韓國先至有，但依家有咗慈山寺，以後就唔使山長水遠跑去外地靜修喇！
