SUN搞作：打橫嚟講：違例大招牌，又無王管！
早幾日，香港屋宇署喺全港所有報章以不同版面設計的方式，刊登多款啟事廣告，宣傳「違例招牌檢核計劃」，針對喺二○一三年九月二日前已存在的違例招牌，須經合資格的建築專業人士，或註冊承建商檢訂、鞏固和向屋宇署核證其結構安全後，方可保留續用，並每隔五年須重新檢查一次！奇怪的，咁「大新聞」，卻無傳媒跟進！
至於那些違規又不加固改良的招牌，屋宇署話佢哋會「考慮取締不符合規定的檢核工程」（字句冗長囉唆），仲話：「以及對違反法例規定的人士採取檢控及/或紀律處分行動。」（唔知點解，句子裏要多用一條斜線符號分隔？）另外，文中已講明「採取檢控」或「紀律處分」啦！何解又要加「行動」兩字？真多Q餘！
好嘞！香港「違例」（即「不合法」啦）招牌問題，已擾攘多年，如今有「行動」，總算「遲到好過無到」嘅！但細看「廣告」裏的「違例招牌」，全只屬「工程結構法律」層面，並無說出最重要的「核心問題」，包括招牌的尺寸、重量、同樓宇的關係，以及樓宇外牆的承受力……等等。
家陣，香港政府對法例的拿揑態度，總傾斜給財團搵錢。嗱！違規招牌惡到無王管，看看奶路臣街與西洋菜街交界，現為補習社廣告的大招牌，大到無倫，有幾層樓高，卻是勾掛在那幾十年樓齡的舊樓外牆，好鬼牙煙。還有，招牌本是該棟樓宇用戶的招幌，現今，卻不是那大廈商戶的招牌，仲係有人包攬咗代理的呀！
上述嗰個大招牌，唔知幾時會連外牆都扯甩跌落街，到時，又係唔見棺材唔流淚的香港慘案錄！可怖的，該招牌屬「違例」的範圍裏！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
