SUN搞作：網絡小說：一鑊救世界
奧巴馬決意出兵敍利亞，深感欠缺一名熟悉生化武器的專家，於是找來了掌管過本港衞生防疫事宜的前高官兼現任廢官一鑊。
一鑊去到白宮，奧巴馬見他肥頭耷耳，戇戇居居，決定要考考佢，寒喧過後就問：「世上邊個國家生化武器最勁？」一鑊當然不識，於是只好虛應：「哦～～最勁呢～～」奧巴馬卻點點頭：「Yes，俄國係最勁，落毒好犀利，我哋美國人只係識騎牛仔衝鋒，一定要學吓人……」
一鑊剛抹去一額汗，奧巴馬又問：「咁你覺得美軍士兵作戰時要唔要戴罩呢？」一鑊一聽大喜，即答：「男嘅要，女嘅唔使！」奧巴馬感奇怪：「點解男嘅就要戴口罩呢？」一鑊後悔自己心邪，就急話：「因為中東地方，男要防風沙，而女就要尊重人哋信仰風俗，全身包冚晒，唔使再戴罩！」
奧巴馬聽見一鑊唔單止識生化武器，連文化都係專家，深慶得人，好高興咁攬住一鑊：「你就係我要搵嘅人！」點知一鑊良心發現，推開奧巴馬：「其實我唔係生化武器專家，我淨係識走音。」
「Come on! York!」奧巴馬面帶微笑，指住身後獎座：「我夠係和平獎得主啦，打仗咪一樣OK？」
