政壇：搞搞政：肥亨寸議員 質素慘不忍睹
商務及經濟發展局前局長「肥亨」馬時亨闊別政府五年，但對政圈同社會時事都跟得好貼。肥亨尋日出席白鴿黨主席劉慧卿主持嘅網上電視台節目，講到政府管治問題，佢承認依家做官難過以前，皆因立法會多咗激進議員，不時又拉布、又流會，部分議員質素更低到「慘不忍睹」。喺觀感上，政府同議會有好大鴻溝，所以佢建議議員同官員都應該自我增值，多啲溝通。
設計圖片及對白
暗批單雞受款待
至於以前政府管治又係點呢？肥亨坦言氣氛都唔太好，皆因嗰時成日被人鬧「官商勾結」，搞到商界唔敢同官員食飯，點知依家啲議員就去接受國泰同微軟嘅豪華款待，「嗰位接受款待嘅白鴿黨員」，出席微軟活動仲多過佢做官嗰陣時。咦！佢講緊嗰個係咪「單雞」單仲偕？
肥亨話其實呢啲事冇乜問題，因香港係經濟體，政界人士當然要同商界緊密溝通。但佢希望大家以後當見到商界同官員食飯，就唔好再話係官員「官商勾結」喎！佢咁講，即係叫接受款待嘅議員唔好持雙重標準、嚴人寬己囉！
肥亨之後又表示，其實主事某一範疇嘅官員，唔應該喺所負責嘅範疇出問題，否則就會予市民唔好嘅觀感，而從政者道歉其實並無問題，有時仲可以消吓市民嘅怒火添。就好似佢當年喺仙股事件上，其實政策上並無做錯，但因自覺影響到政府聲譽，所以鞠躬道歉。
