政壇：郭家麒試用神油話冇Feel
立法會議員郭家麒係泌尿科專科醫生，對坊間話神油有神奇功效嘅說法時有所聞，最近佢仲破天荒親自試用睇吓有冇效。但佢唔係將神油塗落「敏感部位」，只係塗落手指，咁就話試用過喇！難怪佢話乜嘢感覺都無！
郭家麒（左一）拍攝解構「神油」短片。
郭家麒尋日同浸大化學系講師麥嘉慧開記者會，踢爆日常生活嘅健康謬誤，頭炮係「神油」對男人係咪有神奇功效。佢哋仲特別為此拍攝約三分鐘題為「神油拯雄風」嘅短片，故事講述一名男子在洗手間內向朋友訴苦，自稱被女友恥笑佢「早洩」，然後有人叫佢試吓用「神油」。呢個時候郭家麒就由廁格步出，並駁斥話，「哈哈哈，『神油』係無用o架！」
正所謂講多無謂試吓最實際，郭家麒自爆曾試用神油，但原來只係將神油塗落食指，結論係「半小時過後其實乜感覺都無」，又話神油嘅神奇功效喺醫學上冇乜根據。
