上次二○一○年政改談判，大家焦點只落喺白鴿黨身上，事後又鬧爆該黨同西環密室談判。其實當年民協KK馮檢基同支聯會李卓人都有去，但好似無人記得佢兩個有份咁。KK話今年身為新一年泛民飯盒會召集人，首要任務係希望綑綁二十幾位泛民議員，屆時就可以齊齊同中央談判，藉此組成最大談判籌碼，逼中央交出一個民主政改方案。

設計圖片及對白

蚊型黨冇牙力

KK有呢個提議都幾合理，話晒民協依家仲係一人政黨，影響力極細，如果泛民唔綑綁同中央談判，咁到關鍵時刻，中央或特區政府都只會向白鴿黨呢啲大黨埋手，試問又點會理會民協、街工呢啲蚊型政黨呢？所以KK建議綑綁式談判，最大得益當然係民協自己，咁就唔怕被大黨邊緣化。

長毛唔肯回歸

至於使唔使泛民綑綁投票，KK就話無咁嘅需要，因為唔同黨會有唔同立場，亦唔覺得一齊綑綁有用喎！似乎佢都明白要泛民綑綁同一投票立場係難過登天。既然第一次做飯盒會召集人，KK除咗想泛民綑綁談判，仲想重新邀請人民力量同社民連加入飯盒會，睇嚟佢真係好想做泛民大和解嘅幕後推手。

但社民連「長毛」梁國雄似乎唔係咁想，佢話當初離開飯盒會，係因為唔滿意泛民經常批評佢有暴力行為，但自己行事作風一向無變，如果泛民無喇喇又叫佢重返飯盒會，係咪代表泛民有唔同標準呢？

第一手消息請下載on.cc東方互動iPhone/iPad/Android/Windows Phone Apps