城中鏡：鄭明明緊捉韓流搵真銀
港大明德學院校董會主席張永霖近年愛上去溫哥華避暑，日前佢同太太Silvia返港小休，趁機約老友敍舊。Silvia得知相識多年嘅「美容教主」鄭明明十月將獲頒銅紫荊勳章，特登約佢食晏以示祝賀。Silvia咁有心，明明姐話好感動，爭住請食飯。
從溫哥華返港嘅Silvia（左）同老友鄭明明（右）開心食飯敍舊。
好友相聚，明明姐不忘分享湊孫樂，又計劃與韓國廠家合作生產化妝品，加入「韓流」熱潮。Silvia就透露喺溫哥華生活好寫意，無香港咁侷促。佢大讚老公勤力，越洋不忘為明德學院「撲水」籌款。張生認識當地一位大慈善家，近日頻頻捉住對方開會五次，又落力寫計劃書，游說對方捐錢。忙碌之外，佢哋兩公婆早前都拍拖去倫敦坐郵輪歎世界，環繞英倫三島。Silvia笑言，老公任香港電訊行政總裁時，曾一年飛十九次倫敦，呢幾年無再去，今次重遊舊地，要約老朋友敍吓舊。
