城中鏡：蔡中虎傳退休粉絲失落
城中巨企高層相繼傳出退休之聲，早兩日先見中銀人壽執行總裁蔡中虎親自落分行宣傳新廣告，尋日就聽到佢即將喺年底退休嘅消息，接任人係滙豐人壽前首席執行官老建榮。
蔡中虎被傳年底退休，唔少虎迷或會頓感失落。（資料圖片）
現年六十四歲嘅蔡中虎二○○八年加入中銀人壽，今時今日，公司嘅市佔率升到市場前三甲，蔡中虎實在功不可沒，相信唔少「虎迷」都會因佢退下火線而感到失落及不捨。但中銀香港及中銀人壽發言人就話唔評論市場傳聞喎！
據聞接棒嘅係老建榮，佢已經喺中銀人壽返緊工，睇嚟想趁早摸熟公司運作，大展拳腳。唔講唔知，老建榮同蔡中虎都有些少淵源，事關兩人都曾經喺獅子銀行打滾過！
