城中鏡：陳家強做「官」 揼金刀梁心口
揼心口做善事，被揼嘅同揼人嘅都會笑嘻嘻！社企鑽的嘅第六部無障礙的士尋日投入服務，仲拍賣一盞由無障礙的士嘅避震器循環再造嘅枱燈籌款，財經事務及庫務局局長陳家強充任拍賣官，但現場反應唔多熱烈，陳家強惟有向台下嘅前行會成員揼心口，點名叫佢哋開個價，佢哋亦肯捱義氣，金刀梁先承價八千蚊，另一善長就以八千八百八十八蚊再追多口價，但得手後再捐盞燈出嚟，最後由社企主席倪以理以九千蚊將盞燈捧返屋企。
梁淑儀客串做拍賣官，拍賣枱燈。
梁智鴻（右）被陳家強（中）揼心口後，依然笑嘻嘻。
倪以理最後出咗九千蚊，投咗盞燈捧返屋企。
投得捐出再拍賣
拍賣會由陳家強同鑽的行政總裁梁淑儀（Doris）主持，盞燈底價係六千二百八十八蚊，兩位臨時拉伕嘅「拍賣官」等咗好耐都冇咩人舉手競投，陳家強就向在場嘅金刀梁等埋手，盞燈喺成功拍賣後，即刻被捐出嚟重新競投。
不過現場始終反應冷淡，盞燈最後由鑽的董事會主席倪以理以九千蚊投得。點都好，盞燈捐出去再拍賣過，最少「釣」多九千蚊返嚟嘞。
Doris為咗鑽的嘅業務可謂諗盡計仔，佢諗到食住啟德郵輪碼頭啟用個勢，同哥哥設計無障礙旅遊路線包車套餐，希望外地嘅輪椅使用者都可以嚟香港玩。Doris嘅努力令佢成為首位喺「卡地亞靈思湧動女性創業家獎」亞太區組別入圍嘅港產女創業家，下個月佢就會去法國參加總決賽，可唔可以突圍而出，大家就真係要拭目以待喇！
