尋晚少膽虫做完嘢返屋企，諗住屙個夜尿早啲上床搵周公，忽然部手機好似午夜凶鈴咁響起來，嚇得少膽虫成個彈起，搞到一褲都係，心諗唔通係夜總會啲囡囡打嚟？一聽之下，原來係守夜編輯肥豪，只聽佢口震震咁話：「腦、腦腫……腦、腦細叫你即刻返去堆填區呀！」未等少膽虫回應，條死肥仔便收線了。心諗《爛果》出咁少紙一早印晒啦，唔通有大新聞改版？少膽虫雖然平時淨係識吹水點人做嘢，但喺腦細面前一定要交足戲扮勤力，於是馬上飛車入堆填區。

「頭版咁大粒字都可以錯？」

一到辦公室，便見淫黎坐喺張大班椅度不斷咆哮「錯！錯！錯！」，只見肥豪頭耷耷一碌葛咁企喺佢前面，枱上放咗份《爛果》頭版，少膽虫心知不妙，立即上前問個究竟，淫黎怒問：「少膽虫，你睇唔睇到好大個錯字呀？」少膽虫為表示自己轉數快，即刻回答：「睇到！大標題上面的確有一個『錯』字呀！」淫黎一巴車埋嚟：「盲毛！睇清楚啲啦！」少膽虫睇咗成分幾鐘，先發覺原來標題字「不肖子」變咗「不屑子」，心諗呢鋪真係大檸樂，但仍發揮死撐精神：「我係話『錯』字上面嗰個字錯咗呀。」淫黎又一巴車埋嚟，大喝：「頭版咁大粒字都可以錯？個編輯小學畢業未？識唔識字o架？」少膽虫兩頰通紅怒睥肥豪，諗住將隻鑊推畀佢，點知條肥仔即耍手擰頭說：「唔關我事！個版係着迷你裙果個女編輯靚靚做o架！」

淫黎聞言激到差點癡呆病發，邊噴口水邊大罵：「你條少膽……唔係……係少淫虫，你『用人唯貌』，返工到底係(目及)女定係(目及)題？睇嚟腦腫呢個位都係時候換人！」少膽虫聞言雙腳一軟跪倒地上：「腦細開恩呀，小弟仲有成班化骨虫要養，我平時幫你作咗咁多新聞，無功都有勞吖！」

「咁依家點算？」淫黎氣得快爆血管，少膽虫立即獻計：「我建議即刻回收晒《爛果》跟住直接運去隔籬堆填區埋咗佢，咁咪神不知鬼不覺囉，嘻嘻！」結果，少膽虫成晚運報紙去堆填區運到天光，成身臭足一個禮拜。

第一手消息請下載on.cc東方互動iPhone/iPad/Android/Windows Phone Apps