香港中產壓力如山，唔少市民都批評禍源係政府施政傾斜，財政司司長曾俊華早前為咗掩飾自己嘅失敗，竟然自稱中產，結果被全城狂轟。智經研究中心尋日發布一個有關中產嘅調查，結果顯示按照受訪市民對中產嘅睇法，年薪四百萬元嘅鬍鬚曾點睇都唔屬於中產，再次被踢出政策真空嘅中產群。

設計圖片及對白

智經早前向市民展開調查，以便了解到底普羅港人點樣定義中產。結果顯示，受訪市民對中產嘅定義大都包括有自置物業、薪酬高於中位數唔少，甚至有不菲嘅流動資金在手。有五成半受訪市民認為，中產嘅自置物業應介乎二百萬至八百萬元；超過六成受訪市民就覺得，月入介乎三萬至十萬元就叫中產；單睇呢兩點，住官邸、月薪超過三十幾萬嘅曾俊華已經無可能係中產啦！

調查仲發現，受訪者認為中產同生活品味冇乜關係，有四成受訪者話無生活品味都可以係中產，即係鬍鬚曾口中飲咖啡、睇法國電影等，全部唔係中產嘅被認可特徵，曾俊華呢鋪真係想扮中產都冇行喇！

第一手消息請下載on.cc東方互動iPhone/iPad/Android/Windows Phone Apps