政壇：盛品儒辭職變亞視粉絲
亞視前執行董事盛品儒公布辭職後就無再現身，尋日佢喺青聯就職禮出現，似乎想行低調路線，但走嗰時卻被記者發現，迅即成為全場焦點，佢被追問有乜新動向？佢話自己唔再係亞視董事，不過就做咗粉絲喎！
盛品儒表示會繼續睇亞視。
重播節目又遭投訴
盛品儒話自己「董事變粉絲」，唔打算捐錢支持被重罰一百萬元嘅亞視。盛品儒依家喺亞視無一官半職，聲言同亞視已經無關係，不過一聽到「亞視係咪去到最後一刻」，佢就好似有感而發，獨白咗成分鐘，話自己三年半以嚟，帶領八百個員工，一齊作戰到佢走嗰刻，無後悔，亦都問心無愧。盛品儒話希望前同事唔好氣餒，要愈做愈好，繼續努力，「因為ATV不斷喺艱難中成長」，又話會繼續收睇亞視，做人要向前睇，無謂再糾纏其他嘢喇。
亞洲會製作嘅「謹此獻給James（即盛品儒）」仍然喺亞視多次播放，通訊事務管理局至尋日收到十一宗投訴，一日之內上升咗七宗。
