政壇：陳維安論盡港英美議會
近排西方國家係咪出兵敍利亞成為國際焦點，立法會秘書長陳維安（Kenneth）雖然放緊暑假，但佢都好關心事件，唔知係咪自己都喺議會工作，日前英國及美國議會相繼討論事件，佢都透過社交網站評論一番，仲趁機介紹吓香港議會嘅安排。
陳維安喺社交網站評論英美議會不同。（資料圖片）
Kenneth相當留意呢啲議會新聞，話晒佢都係半個議會「行家」，佢尋日就轉載美國傳媒報道，話美國總統奧巴馬成功爭取眾議院議長支持向敍利亞動武，Kenneth仲煞有介事介紹：「美國的議會議長，有別於英國國會議長，以至其他西敏寺系統的議會議長，是有政治立場的。」香港嘅制度當然跟美國唔同啦，Kenneth評天下時事，對議會阿頭嘅身份規定咁關注，唔通佢對本港立法會主席嘅角色有乜嘢諗法﹖
