政壇：內地豪客搶住讀品味班
中國經濟急速騰飛，富裕一族人數急增，但係佢哋身家有幾多個零都好，「軟實力」都係為人詬病。不過，內地富人近來有新玩意，除咗玩投資外，仲有一系列加強品味班，即使收費高達十萬、二十萬元，都大把捧場客。
呢啲品味班科目多多，前排好流行儀態班，就算收費要成十萬人民幣（下同），都有好多靚太爭住去讀。近排拍賣行佳士德、紅酒商Sarment同高級百貨公司都推出「雞精班」，幫班內地豪客「速成」藝術、品酒同埋高級時裝嘅知識。呢啲「雞精班」絕對唔係「填鴨式」教育。好似佳士德嘅「藝術團」咁，收費二十萬，團友會喺十四日入面去北京、香港、台北同倫敦，學點賞析藝術品，由中國陶瓷到名畫家莫奈作品都會教！
另外，Sarment亦開辦「紅酒短期培訓班」，收費三千元一堂，對象係內地嘅專業人士，等佢哋見客應酬嘅時候唔會「口啞啞」！
