政壇：黃錦星死撐滲漏係意外
打鼓嶺堆填區被踢爆發生垃圾污水滲漏事件，當局仲被揭隱瞞多時，導致北區環境受到污染，事件被踢爆時，適逢環境局局長黃錦星放假，署理局長嘅副手陸恭蕙拖延幾日先現身解畫，一味靠撐。尋日黃錦星卒之露面，但佢嘅板斧仍然係撐，堅稱滲漏事件係七月底先首次發生，又話事件係意外喎！作為問責局長，佢本周五會出席西貢區議會會議討論堆填區問題。
黃錦星昨強調，打鼓嶺堆填區滲漏事件是「意外」。
黃錦星由上月二十五日放假至三十日，佢尋日出席建造業議會嘅活動，事後再被人追問堆填區滲漏污水一事，佢澄清指，環保署三月知悉堆填區有「污水問題」，係指涉調整承辦商排放污水上限，與滲漏事件係「兩回事」，仲多次形容滲漏事件係「意外」，黃錦星仲話，今次事件係有污水儲存缸破損引起，加上雨季令排污系統有負荷，係設計不能預計的事，屬個別事件。
佢又話下次有同類事件發生，應該盡快公布，並考慮成立與地區人士溝通的恒常機制，就堆填區日常運作或任何事件，與堆填區附近居民加深了解。
