政壇：貪曾停產「潤滑劑」種禍根
本港樓價貴到嚇人，年輕一代甚至中產都嗌置業難，現屆政府被指「盲起樓」，但其實禍源早在「貪曾」前特首曾蔭權爵士任內時已種下，正如運輸及房屋局局長張炳良尋日所講，「居屋係置業途徑，亦係公私營房屋之間嘅潤滑劑」，可惜呢隻潤滑劑喺貪曾在任時就已經完全停產，搞到本地私樓樓價不斷飆升，「無殼族」大升之下，貧富懸殊亦加劇，貪曾呢個罪魁禍首真係害人不淺。
特區政府喺二○○二年起全面停建居屋，貪曾二○○五年上場做特首，就翹埋手話明唔再起居屋，佢一時又話無地、一時又話受負資產教訓，要摧毀樓市好容易，唔想起居屋增加供應摧毀樓市；甚至講到總之政府要全面退出房屋市場。就喺貪曾諗住做完個任期、坐夠私人遊艇同飛機就可以去深圳禮賓府歎世界嘅時候，本港樓市供應就一年比一年緊張，即使四方八面要求佢復建居屋，佢仍然係愛理不理，又講風涼話，話即使復建居屋，都唔能夠即時解決問題。
喺佢任內收尾嗰兩年，樓價實在升得太勁，復建居屋已經成為社會共識，但係佢又特別死要面，諗到搞置安心同新居屋等嘅騎呢居屋，不過已經太遲，呢個計劃亦被揶揄為至灰心計劃。依家居屋又被視為潤滑劑，證明貪曾嘅樓市睇法衰晒啦！
